-- ADVERTISEMENT --

Naglab-ot sa 75 ka loose firearms ang boluntaryo nga gin-surrender sa Police Regional Office 6 sa sulod sang 24 ka oras.

Matandaan base sa Regional Operational Accomplishment Dashboard sang PRO6, natigayon ang pagsungka sang mga armas halin alas-6:00 sang aga sang November 14 tubtob alas-5:59 sang aga sang November 15, 2026, sa idalom sang Project Restrict Tract and Turn-In “RTT” 3389.

Sa interview sang Bombo Radyo kay Police Major Lailyn Sencil, Spokesperson sang Police Regional Office 6, iya ginpahayag nga nanguna ang Iloilo Police Provincial Office sa may pinakadamo nga armas nga nasungka nga naglab-ot sa 20, ginsundan sang Capiz Police Provincial Office nga may 18, Aklan Police Provincial Office kag Antique Police Provincial Office nga may 14, Guimaras Police Provincial Office nga may 5, kag Iloilo City Police Office nga may 4 ka armas.

Pahayag pa niya nga kabahin ini sang padayon nga kampanya sang kapulisan sa pag-agda sa mga pumuluyo nga boluntaryo nga magsungka sang mga loose firearms agud mapalig-on ang seguridad kag malikawan ang paggamit sang mga armas sa ilegal nga aktibidad.

Sa karon, ginapangabay sang PRO6 ang publiko nga magpadayon sa pagbulig sa kapulisan kag maghatag sang impormasyon parte sa mga ilegal nga armas kag iban pa nga kriminal nga aktibidad agud mapadayon ang kalinong kag kahilwayan sa komunidad.

-- ADVERTISEMENT --