-- ADVERTISEMENT --

Nagdesisyon si anay Miss Universe Philippines 2023 Michelle Dee nga mag-atras sa iya kuntani nga pag intra sa nagahilapit nga Miss Grand International All Stars matapos siya maoperahan bangod sa appendicitis.

Sa opisyal nga pahayag nga iya ginpagwa online, ginkumpirma ni Dee ang iya pag-atras sa kompetisyon agod mahatagan sang bastante nga tion ang iya kaugalingon para magpaayo halin sa operasyon.

Nagsugod ini matapos mabalita nga gindala sya ospital sang Nobyembre 9 matapos makabatyag sang mabaskog nga kasakit sa iya tiyan, nga nangin rason agod operahan siya gilayon paagi sa emergency appendectomy.

Ginsugiran man si Dee sang iya medical team nga sundon ang natalana nga tion sang iya pagpa-ayo kag ginlaygayan nga likawan anay ang malawig nga pisikal nga mga aktibidad kag mabug-at nga pag-ehersisyo agod malikawan ang posible nga komplikasyon samtang nagapaayo.

Ginkabig naman sang beauty queen nga kinahanglan niya anay hatagan sang importansya ang iya kahimsog kag pagpa-ayo.

-- ADVERTISEMENT --

Samtang, nagpaabot man sang mensahe sang suporta sa iya ang iya mga kapareho nga beauty queen, lakip na si Miss Universe 2023 Sheynnis Palacios nga nagsiling, “My Michelle! I hope you are well, take care of yourself.”

Nagpadala man sang mensahe ang kuntani iya nga kasabayan sa kompetisyon kag reigning MGI All Stars queen halin sa Colombia nga si Vanessa Pulgarin, nga nagsiling, “I hope you’re well.”

Ang kuntani nga pag intra ni Dee sa amo nga kompetisyon amo ang dugay na nga ginahulat nga pagbalik niya sa beauty pageant scene, kun sa diin makaupod niya ang iya kapwa Pinay beauties nga sanday Alexie Brooks kag Anne Patricia Lorenzo Diaz.