-- ADVERTISEMENT --

SHENZHEN, CHINA-Ginkabig ni President Ferdinand Marcos Jr. nga matahum kag mainit nga gesture sang China ang pagpili sa Filipino hit song nga “Anak” bilang entrance music niya sa ginpatigayon nga Asia-Pacific Economic Cooperation (APEC) banquet sa Shenzhen, China, Biyernes.

Suno kay Marcos, daku nga kadungganan nga ginpili sang host country ang bantog nga kanta nga ginsulat kag ginpasikat ni Freddie Aguilar, nga isa sa pinakakilala nga Filipino songs sa internasyonal nga entablado.

Ginpaathag man sang presidente nga wala dapat hatagan sang malawig nga kahulugan ang pagpili sang kanta, bangud isa lamang ini ka popular nga obra musikal nga ginpatukar agud pasidunggan ang ila bisita, pareho man sang kinaandan nga pagpatukar sang mga popular nga kanta sa Pilipinas kon may ginahost nga mga bisita halin sa iban nga pungsod.

Ginklaro man ni Marcos nga ang “Anak” amo lamang ang ginpatukar sa iya pagsulod sa banquet, samtang ang “Leron Leron Sinta” naman ang ginpatukar sa tion sang panihapon, kag nahambal niya nga ang “Anak” ang isa sa pinakadaku nga international Filipino hits nga nakilala sa madamo nga pungsod.

Dugang pa sang presidente, nahubad na sa 51 ka lengguwahe ang nasambit nga kanta, gani para sa iya, ang pagpili sini sang China isa ka pagkilala kag pagpasidungog sa musikal nga tradisyon kag kultura sang Pilipinas.

-- ADVERTISEMENT --