Pormal nga ginpadala sang Senate Committee on Ethics and Privileges kay Senador Ronald “Bato” Dela Rosa ang reklamo batuk sa iya kag ginhatagan ini sang 15 ka adlaw humalin sa pagbaton sang notice agud magsumiter sang written explanation.
Suno kay Senate Committee Chair Senator Vicente “Tito” Sotto III, nakapasar na ang porma kag substance sang reklamo nga ginpasaka sang civil society group nga Wag Kang KuCorrupt matapos nga nagsumiter sang dugang nga affidavit ang grupo.
Nag-ugat ang reklamo sa gin-alegar padayon nga pag-absent ni Dela Rosa sa mga sesyon sang Senado samtang padayon nga nagabaton sang sweldo halin sa pundo sang publiko, gani naghingyo ang grupo nga silutan ini sang nagakaigo kag i-suspend ang bulanan nga sweldo suno sa “no work, no pay” principle.
Madumduman nga nag-umpisa ang masami nga pag-absent ni Dela Rosa sadtong Nobyembre 2025 kasunod sang mga report angut sa gina-alegar arrest warrant sang International Criminal Court batok sa iya sa kaso nga crimes againts humanity may kaangtanan sa kampanya batok sa iligal nga droga sa panahon ni Duterte administration, kon sa diin nagserbe ini bilang hepe sang Philippine National Police.











