TAFT, Tapaz, Capiz – Patay ang tatlo ka indibidwal matapos ang nagluntad nga aksidente sa Barangay Taft, Tapaz, Capiz.
Ang biktima amo ang isa ka mag-asawa nga 42, 52 -anyos, isa ka menor de edad, kag 18-anyos nga pasahero.
Sa interview sang Bombo Radyo kay Police Major Gregg Anthony V Salbang Chief of Police sang Tapaz Municipal Police Station, iya ginpahayag nga base sa inisyal nga imbestigasyon, yara sa husto nga linya ang tricycle samtang ang motorsiklo ang nagsulod sa lane sini, nga nagresulta sa mabaskog nga pagbungguanay.
Suno kay Salbang, posible nga nagadalagan sing madasig ang motorsiklo kag wala na nakalikaw sa trisikol, kun sa diin kung basihan ang lugar malawig nga highway ang lugar kag madulom ini kon gab-i, nga posible man nga nangin rason sang aksidente, samtang bangud sa mabaskog nga impact, ang mag-asawa nga sakay sang tricycle gindala sa ospital apang gin-deklarar nga dead on arrival kag ang menor de edad nga driver sang motorsiklo ginhatagan pa sang resuscitation sang attending physician, apang wala man ini nakaluwas.
Pahayag pa niya, may saksi nga nagasunod sa duha ka salakyan sang tion sang aksidente kag nakahatag sang dugang nga impormasyon sa mga imbestigador. Suno man sa mga first responder, wala sang nakita nga nagsuksok sang helmet ang mga sakay sang motorsiklo.
Dugang pa sa impormasyon gin-usisa pa sang imbestigador ang mga dokumento sang duha ka salakyan kag sang mga nadalahig sa aksidente. Magapakig-angot man ang kapulisan sa mga opisyal sang barangay kag lokal nga panguluhan agud mahibaluan ang posible nga mga tikang, lakip ang pagbutang sang mga signage, para malikawan ang kaangay nga mga insidente.
Sa karon ginapanawagan naman sang Tapaz PNP ang mga ginikanan nga indi pagtugutan ang menor de edad nga magmaneho sang motorsiklo kag ginpahanumdom man ang tanan nga motorista nga magsuksok sang helmet kag iban pa nga protective gear, maghalong sa pagpadalagan kag mangin mapinadayunon sa pag-obserbar sang palibot agud malikawan ang aksidente sa dalan.











