-- ADVERTISEMENT --

Ginpahayag ni President Ferdinand “Bongbong” Marcos Jr. ang mga konkreto nga resulta sang iya pagpartisipar sa 33rd APEC Economic Leaders’ Meeting sa Shenzhen, China, lakip na ang mga tikang para mapauswag ang free trading, masiguro ang luwas nga suplay sang mga produkto kag magbukas sang mas madamo nga oportunidad para sa mga Pilipino.

Sa iya pagpartisipar sa summit, gin-agda sang Pangulo ang mga miembro sang APEC nga kilalahon ang edukasyon kag propesyonal nga kwalipikasyon sang mga Pilipino agud mapadali ang ila pagpangita sang trabaho sa iban nga pungsod.

Ginpabug-atan man niya ang importansya sang pagsuporta sa mga micro, small and medium enterprises (MSMEs), paghimo sang dugang nga trabaho kag pagbukas sang bag-o nga merkado para sa mga produkto kag serbisyo nga halin sa Pilipinas.

Isa sa mga importante nga resulta sang iya pagbisita amu ang kasugtanan sa trading sa tunga sang Pilipinas kag Chile.

Dugang pa diri, nakakuha man ang Pilipinas sang investment pledges nga nagabalor sang P41.1 bilyon halin sa mga kompanya sang China, nga ginapaabot makahatag sang sobra 7,000 ka dugang nga trabaho para sa mga Pilipino.

-- ADVERTISEMENT --

Suno kay Marcos, makabulig ang mga kasugtanan kag investment nga ini sa pagdamo sang investors, pagpalig-on sang lokal nga industriya, pagpalapad sang trading kag paghimo sang mas madamo nga dekalidad nga trabaho para sa mga pumuluyo.

Ginalauman nga paagi sa sini nga mga kasugtanan, mas madamo nga oportunidad ang mabuksan para sa mga lokal nga negosyo kag manggagawa, samtang mapalapad pa ang pagpakigbahin sang Pilipinas sa internasyonal nga trading.