Ginpakita ni Miss Philippines Bea Millan-Windorski ang manggaranon nga kultura kag tradisyon sang rehiyon sang Cordillera paagi sa iya national costume sa Miss Universe 2026 nga ginahiwat sa Puerto Rico.
Ang iya panapton, nga gintawag nga “Diwa ng Kordilyera” inspired sang manggaranon nga kultura kag tumandok nga mga tradisyon sang Kalinga kag Mountain Province, nga nagapakita sang tradisyonal nga mga desinyo, artistic nga beadwork kag mga elemento sang Banga Salidsid.
Suno kay Bea, ang katuyuan sang amo nga panapton indi lamang sa pagpakita sang ikasarang kag talento sang mga mamumugon nga Pilipino sa international stage, kundi sa paghatag man sang pasidungog sa pagkamalig-on kag kabakod sang mga kababainhan nga taga-Cordillera.
Ginlaragway man sini ang outfit bilang representasyon sang identidad, palanublion kag adbokasiya sang mga Pilipino nga luyag niya dal-on sa bug-os niya nga pagpanglakaton sa Miss Universe.
Ang national costume gindesinyo sang fashion designer nga si Anthony Ramirez.











