ROXAS CITY – Nadugangan pa ang numero sang mga patients under investigation (PUIs) bangud sa coronavirus disease 2019 (COVID-19) sa probinsiya sang Capiz, apang nabuhinan naman ang numero sang mga active persons under monitoring (PUMs).
Base sa pinakabag-o nga datos nga ginpaguwa sang Provincial Health Office subong nga adlaw, nagdangat na sa 16 ang numero sang active PUIs nga yara sa hospital quarantine, nagsaka sang apat halin sa 12 nga napagkit sa datos nga ginpaguwa kahapon nga adlaw.
Nagapabilin naman sa 15 ang yara sa home quarantine.
Sa kabilogan, may yara na sang 31 ka mga active PUIs sa Capiz.
Samtang, nabuhinan naman ang numero sang mga PUMs sa probinsiya.
May yara na lamang sang 2,901 ka active PUMs karun halin sa 3,601 sa datos kahapon.
Sa kabilogan naglab-ot sa 4,558 ang napagkit nga PUMs sa diin 1,657 sa ila ang nakalampuwas na sa 14-days home quarantine period.
Nagapabilin man sa isa ang positibo nga kaso sang COVID-19 sa probinsiya.
Ang pasyente nga residente sang Jamindan kag empleyado sang kapitolyo probinsiyal ang padayon nga ginabulong sa Western Visayas Medical Center sa Iloilo City kag amat-amat na nga nagaayo ang kundisyon.
