Ginpanginwala sang Armed Forces of the Philippines (AFP) ang mga report sa pagbiya suno sa pwesto sang pila ka mga military personnel kasunod sang pag-aresto kay anay Presidente Rodrigo Duterte.
Sa isa ka interview, ginpahayag ni AFP spokesperson Col. Francel Margareth Padilla nga indi pa kumpirmado ang mga balita kaangut sa pagbiya suno sang mga AFP personnel bilang pagpakita sang suporta sa anay Presidente nga gin-aresto kag gindala padulong sa The Hague, Netherlands sadtong Martes bangud sa nahimo nsini nga mga krimen batuk sa mga tawo sa kasagsagan sang kampaniya sang iya nga administrasyon kontra sa iligal nga droga.
Kaangut sini, ginganyat sang AFP official ang tanan nga likawan ang pagpalapta sang indi kumpirmado nga impormasyon kag palawigon ang kritikal nga panghunahuna.
Pahayag pa ni Col. Padilla nga nagapabilin nga propesyunal, naghiliusa kag non-partisan institution ang Sandatahang Lakas sang Pilipinas kag committed sa mandato sini nga depensahan ang pungsod kag pagaserbehan ang pumuluyo nga Pilipino.
Padayon man suno ang ila nga mga tinawo nga nakatutok sa ila nga ginsumpaan nga katungdanan, panindugan sa rule of law kag chain of command.
Sa bahin naman sang Philippine Army, ginpahayag ni Army spokesperson Col. Louie Dema-ala nga wala sila sang nabaton nga anuman nga report nga may nagbiya sa pwesto nga mga suldado.
Pananglitan man suno nga ang mga report nga ini ang nagikan sa social media, indi kinahangalan patihan gilayon.
Ginsiguro man sang Army official nga nagapabilin nga mataas ang moral sang Army kag nagapabilin nga isa ka propesyunal nga organisasyon nga nakatuon sa mandato sini bangud nagapangatubang ang pungsod sa iban pa nga mga problema.
Ginpahayag man sini nga indi kinahanglan sang loylty check sa ila nga grupo.
Samtang, ginpahayag naman ni Philippine Air Force Col. Maria Consuelo Castillo, wala sila sang namonitor nga anuman nga unrest ukon pagbiya sang sin-o man nga personnel sa ila nga grupo.
