Agenda para sa Mayo 27 conference sa kaso ni FPRRD, ginpagwa na sang ICC

Ginpagwa na sang International Criminal Court ukon ICC ang agenda para sa natalana nga status conference sa Mayo 27 may kaangtanan sa kaso ni anay Presidente Rodrigo Duterte. Lakip sa pagatalakayon amo ang posible nga petsa sang paglilitis, presentasyon sang ebidensya kag mga testigo, proteksyon para sa mga testigo, kag iban pa nga legal nga proseso antes magsugod ang trial.

Ginpahayag man sang korte nga pagahisgutan ang partisipasyon sang mga biktima, mga kinahanglan nga dokumento kag mga mosyon nga dapat anay resolbahon antes ang pormal nga paglilitis. Samtang, ginpahibalo man nga si Duterte ang nagdesisyon nga indi na magtambong sa status conference kag ginpasalig niya ang iya pagsalig sa iya legal team para magrepresentar sa iya.