Padayon ang aktibo nga koordinasyon kag information dissemination sa tagsa ka barangay sa Banwa sang President Roxas, Capiz nga amo nga rason kon ngaa wala sang may na-record nga kaso sang Children in Conflict with the Law (CICL) sa nasambit nga lugar.
Ang Children in Conflict with the Law nagatumod sa mga kabataan nga naga-edad sang manubo sa 18 anyos kag ginaalegar, gin-akusaran ukon napamatud-an nga nakahimo sang sala sa idalom sang layi sa pungsod.
Sa interview sang Bombo Radyo kay President Roxas, Capiz Mayor Receleste Escolin, iya ginpahayag nga daku ang papel sang padayon nga koordinasyon sang lokal nga gobyerno sa tagsa ka barangay agud mamonitor ang sitwasyon sang kabataan kag malikawan ang posibleng pagsulod sa mga illegal nga aktibidad.
Suno pa sa alkade, may gin-hire nga social worker ang banwa agud magpatigayon sang mga symposium kag information drives sa kabataan kag ginikanan, nga nagatutok sa pag-educate parte responsable nga buluhaton.
Ginpasangkad sini ang youth development programs sa banwa kaangay sang sports activities kag iban pa nga community-based initiatives nga makabulig sa produktibo nga pag-uswag sang mga kabataan.
