Nagtaliwan na ang aktres nga si Sue Prado sa edad nga 44.
Ini ang ginkumpirma sang iya utod nga si May Shereen Prado paagi sa iya Facebook post, isa ka adlaw matapos ang iya pagtaliwan.
Wala naman ginbuyagyag ang kabangdanan sang iya nga kamatayon.
Suno kay May, si Sue isa ka tawo nga nagdala sang kasanag sa iban kag nagdedikar sang iya kabuhi sang bug-os nga tagipusuon sa iya pamilya kag karera.
Si Sue, kilala sa iya mga ikasarang sa pag-arte sa indie kag mainstream nga mga pelikula kag telebisyon, lakip sa ya mga proyekto amo ang “Barber’s Tales,” “Oro,” “Area,” “Himpapawid,” “Dagsin,” “Thelma,” “Ilustrado,” kag “Madrasta.”
Nangin kabahin man siya sang 3rd Sharm El Sheik Asian Film Festival (SAFF) sang 2019, kon sa diin nangin judge siya sa kategorya sang Feature Films.
