ROXAS CITY – Nagpaguwa sang isa ka executive order ang alkalde sa banwa sang Dao, sa probinsiya sang Capiz, sa diin gindeklara tagsa ka adlaw sang Miyerkules bilang Municipal Dengue Prevention Day.
Suno kay Mr. Adrian Espiritu, health sanitary officer sang Dao Rural Health unit nga ginhimo ni Mayor Ernesto Escutin ang nasambit nga tikang bilang aksyon sa pagtaas sang kaso sang dengue sa Capiz.
Nahibaluan nga kada Miyerkules nga adlaw mabatian ang sirena sang firetruck nga magalibot sa banwa nga nagapatimaan sang pagguwa na sang mga tawo sa ila mga balay kag pagbuligay sa pagpanglimpyo sa ila palibot kag pagpangita sa breeding places sang mga lamok nga nagadala sang dengue.
Nagapati ang alkalde nga daku ang mabulig sang Municipal Dengue Prevention Day para matapna ang pagtaas sang nasambit nga sakit sa ila banwa.
Nahibaluan nga naglab-ot na sa 197 ang kaso sang dengue nga na-rekord sa banwa sang Dao, sa diin apat na ang napatay sa amo nga sakit.
