ROXAS CITY – Bangkay na sang nasapwan sa poso negro ang isa ka amay nga nadula sang pila ka adlaw sa Sitio Puntod, Barangay Dinginan, sining syudad.
Sa interview sang Bombo Radyo kay Mrs. Corazon Azuro, tiayon sang biktima nga mismo ang ila nga anak nga suspek nga si Roger ang nagtudlo kun diin makita ang bangkay sang amay nga iya ginpatay.
Posible suno sa ginang nga naluoy na sa iya ang anak nga si Roger, matapos nga nakita ang iya nga pag-antos sa pagpangita sa bana nga nadula sa sulod sang lima ka adlaw.
Indi man mabasol ang anak bangud ginasakit ini sang amay sang buhi pa.
Daku ang posibilidad nga naubos na ang pasensiya ni Roger bangud antes ang krimen nakaangkon sang indi pag-intiendihanay ang mag-amay sa diin gintuyo pa nga lab-on sang biktima ang suspek, apang nasagang niya ini sang iya nga kamot.
Nahibaluan nga matapos akuon sa iloy ang pagpatay sa amay nagpangayo sang patawad ang suspek sa nahimo nga kasal-anan.
