ROXAS CITY, CAPIZ- Pilason ang isa ka amay matapos ginpahayag ginlabo sang kaugalingon nga anak gamit ang isa ka bolo sa sulod sang ila nga balay sa Barangay Dinginan, Roxas City, Capiz.
Ang biktima amo si Dionisio Arciga, 80-anyos, samtang ang ginatudlo suspek amo si Jonery Arciga, 56-anyos kag lunsay residente sang nasambit nga lugar.
Sa impormasyon nga nakuha sang Bombo Radyo nagikan sa Roxas Component City Police Station, ginpahayag nga samtang nagahigda sa duyan ang biktima sa sulod sang ila nga puluy-an, hinali nga nag-abot ang suspek kag ginpangbugto ang higot sang duyan antes nga ginlabo ang biktima.
Bangud sini, nag-angkon sang mga pilas sa nagkalain-lain nga bahin sang lawas ang biktima.
Sa pihak sang naangkon nga mga pilas, nahimo pa sang biktima nga maglakat pakadto sa iya nga utod kag nagpangayo sang bulig nga gilayon naman ginpadangat sa isa ka pribado nga ospital sa syudad.
Madasig naman nga nakapalagyo ang amo nga suspek matapos nga nakomiter ang amo nga insidente.
Sa subong, nagapatigayon na sang hot pursuit operation ang Roxas Component City Police Station agud nga madakpan ang amo nga suspetsado samtang nagapabilin sa amo nga ospital ang biktima para sa padayon nga pagpabulong.
