Ginsita sang isa ka senador ang Anti-Money Laundering Council (AMLC) kun ngaman indi natumod sang ahensya ang mga kaduda-duda kag iligal nga transaksyon sa POGO sa Bamban, Tarlac.
Sa budget deliberation sa plenaryo kun sa diin ginadepensahan ni Senate Finance Committee Chairperson Grace Poe ang AMLC, ginapa-eksplekar ni Senate Minority Leader Koko Pimentel ang ahensya kun ngaman ang opisina pa ni Senator Grace Poe ang naka-detect sa mga iligal nga aktibidad sang POGO ni dismissed Bamban Mayor Alice Guo.
Suno pa, kun indi pa naglupok sa mga hearing sa Senado ang nahanungod sa mga iligal POGO operation ang posible nga tubtob sa karon ang wala pa nakasuhan sang paglapas sa layi kaangut sa money laundering si Guo.
Apang suno kay Poe, wala gilayon nakita sang AMLC ang money laundering activities ni Guo bangud wala sang nag-report ukon nagsumbong sa ila pamaagi sang suspicious transaction report (STR).
Ginpahayag pa ni Poe nga dapat nga maimbestigahan man sini ang mga bank representative sa kapaslawan nga isugid ang mga kaduda-duda nga transaksyon.
Hinala sang AMLC nga posible nga may sabwatan sa tunga sang mga bangko, local representative sang mga bangko, kag mga covered individual nga responsable sa pag-report sang mga iligal nga transaksyon.
