ROXAS CITY -Nahulog sa regular filing ang ginpasaka nga panumbungon nga alarm and scandal sang mga katapo sang kapulisan batuk sa 73-anyos nga anay alkalde sang banwa sang President Roxas nga si Ramon Consing Locsin.
Sa ginpaguha nga order sang Provincial Prosecutor’s Office, ginmando ang paghilway kay Locsin gikan sa kostudiya sang mga otoridad bangud wala makahingagaw ang mga ini sa pagpasaka sang panumbungon antes ang 12 ka oras nga period.
Nahibaluan nga 9:00 kahapon sang aga sang maka file sang panumbungon ang mga otoridad kag naglapaw na sa reglementary period nga 12 oras.
Ginhatagan sang napulo ka adlaw ang anay alkalde nga makasumiter sang iya nga sabat angut sa panumbungon nga ginpasaka batuk sa iya.
Matandaan nga gindakop si Ramon Consing Locsin sang mga otoridad matapos nagpinalupok ini sang armas luthang sa Barangay Cabug-Cabug sa amo nga banwa.
Mahimo man mapasakaan sang dugang nga panumbungon si Locsin matapos nga nahulog na lamang sa regular filing ang ginpasaka nga panumbungon.
