Naglunsyar sang Archdiocese of Capiz sang isa ka libro nga naga-unod sang kasaysayan sang Simbahang Katoliko sa probinsya bilang kabahin sang selebrasyon sang ika-75 nga anibersaryo sini.
Ginpangunahan ni Capiz Archbishop Victor B. Bendico ang paglunsyar sang libro nga “Beneath the Azure Sky: A History of the Archdiocese of Capiz (1951–2026)”, nga ginsulat ni Fr. Dedert V. Duarte.
Ginpatigayon ang programa sang Hulyo 11 sa Immaculate Conception Metropolitan Cathedral sa Roxas City, Capiz.
Ginasaysay sang libro ang kasaysayan sang Simbahang Katoliko sa Capiz halin sang pag-abot sang mga Augustinian missionaries sang 1566.
Gintalakay man sini ang pagtukod sang Diocese of Capiz sang 1951 kag bilang Archdiocese sang 1976.
Isa man sa importante nga nadiskubrehan ni Fr. Duarte amo nga ang opisyal ukon canonical creation sang Diocese of Capiz natabo sang Hulyo 11, 1951, kag indi Mayo 28, 1951, suno sa mga dokumento halin sa Vatican kag sa records sang Papal Nuncio.
Lakip man sa libro ang kasaysayan sang mga Catholic schools, seminaries, charitable institutions kag social action programs sang Simbahang Katoliko sa Capiz.
Gintalakay man ang mga tradisyon sang mga Katoliko sa Capiz, kaangay sang debosyon kay Mama Mary, mga pag-obserbar sang Semana Santa, kag ang lokal nga tradisyon nga ginatawag nga “considerad.”
Madumduman nga sa Archdiocese of Capiz naghalin si Cardinal Jose Advincula Jr., antes siya nangin Archbishop sang Manila.
