ROXAS CITY – Indi mabaton sang asawa sang detachment commander sang Barangay Daan Sur Patrol base sa banwa sang Tapaz, Capiz ang nahinabo nga pagluthang-patay sa iya mister sang isa ka cafgu active auxillary sa sulod sang ila nga kampo.
Sa ekslusibo nga interview sang Bombo Radyo Roxas kay Mrs. Dory Esoy, asawa ni Staff Sgt. Ronilo Esoy, miyembro sang 12th IB sang 3ID Philippine Army, ginpahayag niya nga pasakaan nila sang kaso nga murder ang suspek nga si cafgu active auxillary Bonnie Jimenez.
Wala gid naghuna huna ang ginang nga kahapon na lamang ang ila katapusan nga komunikasyon sang mister, sa diin nagtawag pa ini para pamangkuton kun nakapanyaga na sila sang ila mga anak.
Suno pa kay Mrs. Esoy may plano pa kuntani nga magpauli ang iya nga mister sa Agosto 20, para magkaupod sila nga magselebrar sa kaadlawan sang ila anak apang indi na ini matabo bangud ginpatay ini.
Samtang nagahinulsol sa karon ang suspek nga si cafgu auxillary Bonnie Jimenez sa nahimo nga pagluthang-patay sa iya nga commanding officer nga si Staff sgt. Esoy.
Sa interview sang Bombo Radyo kay Jimenez, ginpahayag sini nga handa niya nga atubangon anuman ang mangin penalidad bangud nasanagan na ini sa nahimo nga sala.
Gin-ako sini nga kasubong nadulman ang iya nga panan-awan kag nagblangko ang pinsar matapos nga ginsakit sang biktima bangud posible naakig ini sang maglisensiya nga idul-ong ang iya nga asawa.
Suno sa cafgu nga nagpungko lamang ini matapos ang insedente kag pagkaligad sang isa ka oras, nagsulod sa admin office kag kasunod sang iya nga pagtamyaw sa commanding officer ang pagluthang sini gamit ang M16 rifle.
