Ginkumpirma ni Juanito Victor Remulla nga nagapabilin sa Pilipinas ang pugante nga si Charlie Atong Ang base sa mga nagalapta nga impormasyon ukon sightings nga nabaton sang mga otoridad.
Suno sa Secretary sang Department of the Interior and Local Government (DILG), gilayon nga nagpatigayon sang follow-up operations ang mga kapulisan kag iban pa nga ahensya matapos ang report, apang wala nila naabtan si Ang sa lugar nga ginatudlo.
Ginpasiguro ni Remulla nga padayon ang manhunt operations batuk sa pugante base sa mga raw intelligence reports nga padayon nga ginakolekta sang mga otoridad.
Ginkumpirma man sang opisyal nga may kaupod si Ang nga ginahimo nga isa ka gamay nga grupo, samtang padayon ang operasyon sa iya pag-aresto.
Sa subong, wala pa gihapon klaro kun diin ensakto nagapanago ang pugante, samtang nagapadayon ang coordinated operations sang mga otoridad sa pagdakop sa iya.
