Bagyong Nanmadol padayon nga nagalaslas sa Japan -BINC

ROXAS CITY – Padayon ang paglaslas sang bagyong Nanmadol sa nabagatnan-nakatungdan nga bahin sang pungsod Japan.

Ang bagyo ang naglandfall sa southern Kyushu, takna alas 7:00 sang gab-e sang Dominggo (lokal time sa Japan) nga may kabaskugon nga paghuyop sang hangin sa 178 – 208km/h.

Sa pakig-angut sang Bombo Radyo kay Mr. Josel Palma, Bombo International Correspondent sa Japan, ginsiling sini ngabangud sa bagyo duha na ka persona ang nabalhag nga napatay samtang 90 naman ang napilasan.

Suno diri, amat-amat na nga nagahina ang bagyo apang mabatyagan sa gihapon ang mabaskog nga huyop sang hangin kag mamunog nga pag-ulan sa pila ka rehiyon sa pungsod nga posible tunaan sang pagbaha kag landslide.

Bangud sa paglaslas sang bagyong Nanmadol, naguba ang pila ka mga imprastraktura kag electrical lines kabangdanan sang pagkadula sang suplay sang kuryente sa kapin 260,000 nga mga puluy-an.

Ginpanugyanan naman sang Japan Government nga mag-evacuate na ang masobra 9 ka milyon nga indibidwal sa nakatungdan kag nabagatnan sang mainland Japan sa mga hilway kag mataas nga lugar.

Pahayag ni Palma, napilitan si Prime Minister Fumio Kishida nga ipaiway sang isa ka adlaw ang biyahe padulong sa New York, City agud magtambong sa 77th United Nations General Assembly (UNGA) agud e-assess ang mga pumuluyo nga apektado sang paglaslas sang bagyo.

Samtang, indi pa matul-id ni Palma ang matuod nga kahimtangan sang mga Pilipino ilabi na sa lugar nga gin-igo sang bagyo.