ROXAS CITY – Totally burned ang isa ka balay matapos nasunog sa Sitio Baraks, Barangay Cayus, Pilar, Capiz.
Ang amo nga balay ang ginapanag-iyahan sang mag-asawa nga sanday Joemar Lachica kag Rosy Lachica.
Sa nakuha nga impormasyon sang Bombo Radyo Roxas sa Bureau of Fire Protection-Pilar, nakabaton sila sang tawag pasado alas-11:40 kag nag-abot ang mga ini sa lugar, takna alas-11:55 sang tinalikdan nga gab-i.
Suno kay FO1 Castañales, nabudlayan ang mga ini sa pagresponde bangud indi makasulod insigida ang ila nga fire truck sa nasambit nga lugar bangud nahamtang ini sa mabukid nga bahin sang amo nga barangay.
Apang, pag-abot nila sa ginluntaran sang sunog totally burned na ang amu nga puluy-an.
Nahibaluan nga human sa light materials ang nasambit nga balay rason nga madasig ini nga ginlamon sang kalayo.
Posible nga baga sa dapog sang amo nga balay ang gintunaan sang sunog.
Ginabulubanta nga nagdangat sa balor nga P 7,000 ang nangin kahalitan sa nasambit nga sunog.
Sa karon, padayon pa sa gihapon ang imbestigasyon sang BFP-PILAR agud matumod kun ano ang gintunaan sang amo nga sunog.
