Ginkilala ang banwa sang Jamindan, Capiz, bilang National Finalist sa 2026 Presidential Award for Child-Friendly Municipality sa idalom sang 1st to 3rd Class Municipalities Category.
Sa interview sang Bombo Radyo kay Jamindan, Capiz Mayor Donnah Valdemar, iya ginpahayag nga ang amo nga pagkilala nagapakita sang padayon nga pagpatuman sang banwa sang mga programa kag serbisyo para sa kaayuhan kag pag-uswag sang mga kabataan.
Suno kay Valdemar, prayoridad sang lokal nga gobyerno ang mga kabataan agud maprotekta kag mahatagan sang suporta sa ila mga kinamatarung kag maayo nga palaabuton.
Dugang pa sang alkalde, padayon ang commitment sang Municipal Government sa mga kabataan sa programa kag serbisyo agud mangin mas child-friendly, child-centered kag inclusive ang banwa.
Nahibaluan nga ang Jamindan, Capiz, amo ang nagaisahanon nga LGU halin sa Western Visayas nga nakasulod bilang National Finalist sa amo nga category.
