ROXAS CITY – Ipaiway sang Land Transportation Office (LTO) Capiz ang pagpangdakop sang mga nagaangkas sa motorsiklo sa probinsiya.
Ini ang ginpasalig ni LTO-Roxas City Supervising TRO Henry Melocoton sang ini ang nag-atubang sa ginpatigayon nga sesyon sang Sangguniang Panlalawigan.
Sa nasambit nga sesyon, nagpabutyag ang mga miyembro sang konseho sang ila pagpamalabag sa nasambit nga pagsulundan sang ahensiya.
Diri ginpahayag man nga may mga kabanwahanan sa probinsiya nga motorsiklo gid lamang ang ‘mode of transportation’ ilabi na sa mga nabukid nga porsyon rason nga mabudlay mapatuman ang ‘bawal angkas’ nga pagsulundan sang ahensiya.
Matandaan nga kasunod sang pag-anunsiyo sang nasambit nga pagsuludan sang ahensiya, nag-ulan ang mga reklamo kag pagpakamalaut naggikan sa mga motorista.
Ginklaro man sang mga miyembro sang Sanggunian nga wala sila nagapamalabag sa nasambit nga pagsulundan sang ahensiya apang luyag lamang nila nga mahatagan sang konsiderasyon ang mga ‘immediate’ family nga makaangkas sa motorsiklo.
Apisar nga wala pa sang draft ordinance, ginduso sa nasambit nga sesyon ang ginahinyo sang provincial board sa LTO kag gilayon ini nga naaprubahan.
Ginpahayag naman ni Melocoton nga nagsulat na ini kay LTO Assec. Edgar Galvante angut sa posible liwat nga pagkunsiderar sang ahensiya sa kontrobersiyal nga polisiya.
Nakahanda man nga magpakighinala si Melocoton kay Capiz governor Esteban Evan ‘Nonoy’ Contreras kag ipawatag man sini ang mga deputized agents sang LTO agud mahambalan natuhoy sa pila ka mga konsiderasyon nga ginahinyo sang provincial board.
