ROXAS CITY – Padayon ang pagpahanumdom sang Bureau of Fire Protection ukon BFP- Roxas City Fire Station sa publiko agud malikawan ang pagluntad sang sunog kadungan sang nagahilapit nga pista minatay ukon adlaw sang tigkalalag sa bulan sang Nobyembre 2020.
Ini ang ginpahayag ni Senior Inspector Rowel Limjuco, City Fire Marshal sang mainterview sang Bombo Radyo.
Suno kay Limjuco nga padayon ang pag-rekorida sang mga katapo sang BFP pinaagi sa pagpanagtag sang mga fire safety tips kapareho sang leaflets ukon flyers.
Ginpahayag sini nga ginabilin nila ang mga leaflets sa nagkalain-lain nga mga establisyemento komersyal kapareho sang mga malls, supermarkets kag iban pa agud mahatag sa mga pumuluyo.
Pinaagi sini gina-edukar sang BFP ang mga tawo agud malikawan ang sunog kadungan sa adlaw sang pista minatay.
Magluwas diri, ginapasangkad man sang ila hanay ang Oplan Ligtas na Pamayanan on the Road sa mga kabarangayan subongman ang Oplan Kaluluwa.
