ROXAS CITY – Hugot nga nagpamalabag si Pastor Dionesio Saturnero sang Bible Baptist Church, sa pag-apruba sang Kongreso sa hagna nga House Bill (HB) 9349, ukon Absolute Divorce Act sa Pilipinas.
Sa interview sang Bombo Radyo kay Pastor Saturnero, ginpahayag sini nga indi isa ka maayo nga butang ukon desisyon sang gobyerno ang pagpahanugot sang nasambit nga hagna bangud una madamo ini sang mangin epekto indi lamang sa pungsod kundi sa isa ka pamilya partikular sa mga kabataan.
Suno sa Pastor, ang kasal ukon matrimonyo isa ka sakramento nga kasugtanan sa pagiging isa ka tagipusuon kag pinsar sang babaye kag lalaki.
Ini ang pamatuod sang paghigugma sang mag-asawa sa mata sang Diyos kag tawo.
Sa idalum sang layi, ang matrimonyo may yara sang legal nga implikasyon kag epekto sa mag-asawa.
Bilang mag-asawa indi malikawan ang mga butang nga pag-inaway ukon indi pag-intindihanay kag ang mas malala pa nagaresulta sa pagbulagay, apang indi ini rason agud magresulta gilayon sa pagpakigbulag.
Mahibaluan nga ang divorce bill nakakuha sang mataas nga boto sa Kongreso kung sa diin pabor ang mga ini bangud ginapahayag nga maprotektahan ang mga kababainhan sa ila abusado nga mga bana.
Apang suno kay Pastor Saturneo, indi patas ang layi sa pungsod bangud indi lamang mga kababainhan ang biktima sa pagpang-abuso kundi may yara man sang mga kalalakinhan nga nagasakripisyo kag gina-abuso sang ila mga asawa apang wala lang sang layi ukon gahum nga ipakigbato ini.
Mahibaluan nga halos 78.8% nga mga Pilipino ang Katoliko,kag isa sa mainit nga ginahinalaan ang pag-abot sa divorce.
Dugang pa sini nga kun tani antes nagpatigayon sang pagpiniliay sa Senado, nagpatigayon man sila sang survey sa bilog nga Pilipinas agud mahibaluan kung pila ang pabor sa nasambit nga hagna.
