ROXAS CITY – Kadungan sang iya nagahilapit nga kaadlawan, nag-donate si Capiz Governpr Esteban Evan ‘Nonoy’ Contreras sang iya isa ka bulan nga sweldo para sa mga biktima sang serye sang linog sa Mindanao.
Mahibaluan nga sa Nobyembre 6 natalana nga mag-selebrar sang iya ika-50 anyos nga kaadlawan ang gobernador apang sa baylo nga magbaton, luyag sini nga siya ang maghatag sang regalo.
Nagaapelar man si Contreras sa mga malapit sini nga abyan nga sa baylo nga hatagan siya sang regalo, ihatag na lamang sa mga biktima sang linog nga nagapangatubang sa karon sa krisis.
Mahibaluan nga magapahamtang sang donation box sa Capiz Provincial Capitol kag sa kaadlawan sang gobernador, magapahamtang man sang donation boxes sa Capiz Gymnasium kag ESLA-Governors Mansion nga mahimo mabutangan sang mga donasyon.
Ang nasambit nga tikang ang gintawag nga ‘Kabalaka sang Capiz sa Mindanao’ kun sa diin mismo ang Archdiocese of Capiz ang maga-uyat sang yabi sang mga donation boxes.
