ROXAS CITY – Nagtukod sang task force ang lokal nga gobyerno sang Capiz agud mapunggan ang posibilidad nga pagsulod sang African Swine Fever (ASF) sa probinsiya.
Ang Capiz Provincial African Swine Fever Task Force ukon CPASFTF ang gintukod pinaagi sa Executive Order No. 008-2019 nga ginpirmahan ni Governor Esteban Evan Contreras.
Partikular nga mandatu sang task force amo ang pagpatuman sang mga control measures agud mapunggan ang pagsulod sang ASF sa probinsiya.
Ang nasambit nga task force ang pagapamunuan sang Provincial Veterinarian bilang Executive Officer kag pagabug-usan ini sang nagkalain-lain nga ahensiya sang gobyerno kapareho sang Philippine National Police, Philippine Coast Guard, Traffic Management Group, Aviation Security Command, Maritime Command, Land Transportation Office, Department of the Interior and Local Government, Bureau of Fire Protection, Philippine Ports Authority kag Philippine Information Agency.
Mangin miyembro man sang task force ang Provincial Disaster Risk Reduction and Management Office, Capiz Emergency Response Team, Provincial Engineer and Staff, Provincial Agriculturist, city and municipal mayors, city veterinarian, municipal agriculturists, veterinarians gikan sa Capiz State University, barangay captains and officials, kag mga stakeholders.
