Naka-record sang pinakamanubo nga inflation rate ang Capiz kun ipaanggid sa iban nga mga probinsya sa Western Visayas sang Mayo 2026, sandig sa latest report sang Philippine Statistics Authority (PSA).
May yara sang 4.3 percent nga inflation rate ang probinsya.
Ang inflation ang nagatakos sa pagtaas sang presyo sang mga balaklon kag serbisyo.
Samtang, ang overall inflation rate sa Western Visayas ang nagtaas sa 6.8 percent sang Mayo 2026 gikan sa 6.6 percent sang Abril 2026.
Buot silingon, ang presyo sang mga balaklon kag serbisyo ang padayon nga nagataas sa rehiyon.
Sa data sang PSA, ang mataas nga inflation rate ang bangud sa mataas nga presyo sang pagkaon kag non-alcoholic beverages, restaurants and accommodation services, kag household furnishings and maintenance.
Nagtaas sa 5.7 percent ang food inflation sa Western Visayas sang Mayo gikan sa 4.8 percent sang Abril.
Ang mayor nga rason sang pagtaas amo ang mataas nga presyo sang cereals kag cereal products lakip na ang bugas.
Sa mga probinsya sa rehiyon, ang Antique naka-record sang pinakamataas nga inflation rate sa 9.3 percent, samtang ang Iloilo Province amo ang naga-isahanon nga lugar nga may manubo nga inflation rate sa 7.2 percent gikan sa 7.4 percent sang Abril.
Napabilin naman sang Iloilo City ang inflation rate sa 6.0 percent.
Ginpakita sa data sang PSA nga ang low-income families ang padayon nga nagaatubang sang mataas nga gasto sa pagkaon kag iban pa nga basic needs.
Sa pihak sang pagtaas sang presyo sa rehiyon, ang Capiz nagapabilin nga probinsya nga may pinakamanubo nga inflation rate sa Western Visayas, nga nagapakita sang mahinay nga pagtaas sang ‘cost of living’ kun ipaanggid sa mga kaiping nga probinsya.
