CAPIZ – Ginatinguhaan sang Capiz Provincial Health Office nga makabaton sang measles-rubella vaccines ang tanan nga eligible nga kabataan sa pihak sang kinalain sang numero sa projected kag actual nga target para sa pagpangbakuna.
Sa interview sang Bombo Radyo kay Capiz Provincial Health Officer Dr. Alex Nolasco, iya ginpahayag nga ang projected target nga yara sa 68,000 ka mga kabataan ang lain sa actual number sang eligible nga mga kabataan nga na-identify kadungan sang pagbisita sa mga komunidad.
Suno kay Nolasco, base sa pagpadulong sang health workers sa mga barangay, ang aktwal nga numero sang kabataan nga kinahanglan nga mabakunahan ang ginabanta yara sa 40,000 tubtob 42,000.
Pahayag niya, ang prayoridad sang health office amo nga mabakunahan ang tanan nga eligible children, partikular ang mga naga-edad sang 6 months tubtob 59 months.
Dugang pa sang natungdan, padayon nga nagakooperar ang PHO sa nagkalain-lain nga partners kag local stakeholders agud mapabaskog pa ang vaccination campaign kag malab-ot ang madamo nga kabataan sa komunidad.
Nahibaluan nga ang Measles Rubella Supplemental Immunization Activity ang magaumpisa sa Agosto 10 tubtob Agosto 28, 2026.
