Magapatigayon sang nagkalain-lain nga aktibidad ang Capiz post-war veterans sa Roxas City kadungan sang ‘Day of Valor’ ukon ‘Araw ng Kagitingan’.
Suno kay Retired Colonel Hannibal Lipardo, Region 6 Veteran President and Member Veterans Federation Supreme Council, magapatigayon sila sang parada kag flag-raising ceremony sa Capiz Provincial Park bwas, Abril 9, takna las 8:00 sang aga, bilang paghanduraw sa kabaganihan sang mga Pilipino sa panahon sang World War II.
Ginapangunahan sang mga veterans ang pagkoordinar sa iban nga ahensya agud mapakita sa mga kabataan ang importansya sang Araw ng Kagitingan kag ang sakripisyo sang mga Pilipino nga nagpakigbato batuk sa pwersa sang Hapon.
Ang Araw ng Kagitingan ginaselebrar bilang paghanduraw sa Bataan Death March sang Abril 9, 1942, kun sa diin mas ukon menos 76,000 ka mga Pilipino kag Amerikano nga soldado ang nagsurrender kag linibo ang napatay bangud sa kagutom, kauhaw, kag abuso sang mga Hapon padulong sa Camp O’Donnell sa Capas, Tarlac.
Nagapasalamat naman ang natungdan sa publiko nga padayon nga nagakomemorar sa amo nga kasaysayan kag wala nagakalipat sa kabaganihan sang mga nangin kabahin sang pagpakigbato.
Interviewed by Bombo Saira Joy Alu-ad Bautista | via Zona Libre
