ROXAS CITY – Ginpasidunggan sang Sangguniang Panlalawigan sang Capiz si Irish Karn Villarisco Magallanes, isa ka tumandok sang Barangay Domulog, Roxas City, matapos ini makakuha sang ika-6 nga pwesto sa 2026 Medical Technologist Licensure Examination.
Sa resolusyon nga gin-sponsor ni Capiz 1st District Board Member Emmanuel “Jun Jun” Billiones Jr., ginkilala sang Provincial Board ang talalupangdon nga kadalag-an ni Magallanes, nga nakakuha sang 91.8 percent nga overall rating, kag nangin ika-6 sa bug-os nga pungsod.
Ginkilala man sang konseho ang iya kaalam, pagpanikasog kag dedikasyon sa pagtuon nga nangin importante nga rason sa iya pagkab-ot sang mataas nga ranggo sa nasudnon nga licensure examination.
Si Magallanes nagtapos sa University of San Agustin sa Iloilo City kag una na man nga nakapakita sang iya kaalam kag kapasidad matapos mangin Top 10 sa 2022 Civil Service Examination.
Ang iya bag-o nga kadalag-an nangin dungog indi lamang sa iya pamilya kag alma mater, kundi pati na sa Capiz, ilabi na sa mga kabataan nga nagapangandoy man nga mangin propesyonal kag makahatag sang kontribusyon sa komunidad.
