ROXAS CITY -Indi matago sang isa ka iloy ang iya pagkabalaka sa anak sini nga isa ka Overseas Filipino Worker (OFW) matapos nga nag-positibo sa coronavirus disease (COVID-19) ang duha ka mga kaupdanan sang anak sa trabaho sa Kuwait.
Suno kay Nanay Lydia, nabalaka gid ini sang gintundaan sang iya isa ka anak nga ang utod sini nga si Nira Bigcas ang nakasugid sa iya nga nag-positibo sa nasambit nga balatian ang duha ka kaupdanan nga Ethiopian kag Indian national.
Ginpahayag sini nga naka-estorya na sila sang iya anak kag napahamtang man ang iya balatyagon sang ginsugiran nga gin-isolate na sa kwarto si Nira bangud may close-contact ini sa iya nga mga kaupdanan.
Suno diri nga maayo man kag wala ginapabay-an sang iya mga amo si Nira kag sila mismo ang nagadul-ong sang pagkaon kag iya mga kinahanglanon sa kwarto.
Nakasugid suno diri ang iya anak nga nag-ayo na ang iya pamatyag matapos ini ang nag-exercise kag nakalu-ad sang plema apang nagabatyag pa sang pagsakit sang ulo.
Suno sa iloy nga nagpanugyan ini sa iya anak nga magpakabakod, magkaon sang masustansiya nga pagkaon kag magpahuway sang ensakto para magpanumbalik ang iya nga kapagsik.
