Plano sa karon ni double Olympic gold medalist Carlos Yulo nga makita ang anay coach sini nga si Munehiro Kugimiya.
Si Kugimiya ang nangin coach ni Yulo halin 2016 tubtob 2023 nga amo ang nagbulig agud mangin world-class gymnast ini.
Ginpahayag ni Yulo nga luyag sini nga hatagan sang pagkilala ang anay coach bangud amo ini ang naghanas sa iya.
Apang indi pa sini mapat-od kun bala makaupod niya liwat ang anay coach sa mga masunod nga training sini.
Mahimo nga sa bulan pa sang Nobyembre pagabisitahon ni Yulo si Kugimiya sa Japan.
Sa karon, si Aldrin Castaneda na ang coach sini.
Nagalaom sa gihapon ini nga makaangkon sang Team Yulo sa palaabuton nga Olympics 2028 kun sa diin makaupod sini ang iya nga mga utod.
Ang manghod sini nga si Karl Eldrew ang nagdaog sang mga bulawan nga medalya sa nagkalain-lain nga international gymnastics competitions samtang ang kamanghoran nila nga utod nga si Elaiza ang nagdaog man sang mga gold medal sa nakaligad nga 2024 Palarong Pambansa nga ginhiwat sa Cebu.
