Nagpagwa sang paandam ang Cybercrime Investigation and Coordinating Center (CICC) sa publiko nga magmabinantayon sa mga impormasyon nga nagalapta sa internet may kaangtanan sa nagakatabo nga mga isyu kag hitabo sa Senado. Ginpahanumdom sang ahensya ang tanan nga usisaon anay sing maayo ang mga balita kag impormasyon antes ini patihan ukon ipakalat sa social media kag iban pa nga online platforms.
Suno sa CICC, padayon nila nga ginamonitor ang nagkalainlain nga diskusyon kag mga aktibidad sa digital platforms, lakip na ang mga panawagan para sa mga protesta nga may kalabutan sa bag-o nga mga pagbag-o sa liderato sang Senado.
Bangud sini, gin-agda sang ahensya ang mga Pilipino nga maghalong sa mga wala pa napamatud-an nga impormasyon nga posible makapaguya sa publiko kag makadugang sang tensyon sa pulitika. Ginpabutyag man ni Undersecretary Renato ‘Aboy’ Paraiso nga ang cyberspace indi lamang lugar para sa pagpahayag sang opinyon kundi isa man ka espasyo nga nagakinahanglan sang responsableng paggamit agud masiguro nga husto kag kasaligan ang impormasyon nga ginakonsumo kag ginapaambit sang tagsa ka pumuluyo.
Dugang pa sang CICC, dapat likawan sang mga netizen ang pagpakigbahin sang mga post ukon content nga mahimo mag-aghat sang kapintas, iligal nga binuhatan, ukon ano man nga aktibidad nga makabutang sa peligro sang katawhan kag sang publiko nga kahilwayan.
