ROXAS CITY – Nagpapanaug na sang memorandum order ang City Government para sa imbestigasyon may kaangtanan sa gina-alegar pagpakita sang indi maayo nga pagtratar sang isa ka empleyado sa nagaproseso sang business permit sa Roxas City Hall.
Mahibaluan nga nagpost sa iya social media account ang isa ka lalaki nga ginhingadlan kay Mathew John Montojo Arcangeles angut sa iya na-eksperyensiyahan nga indi maayo nga pag-akumodar sang wala matumod nga empleyado.
Sa interview sang Bombo Radyo kay Mr. Melvin Galagate, tagpamaba sang City Government kag head sang Roxas City Information Division, ginpahayag sini nga ang kasubong nga alegasyon ukon reklamo nagakinahanglan nga mag-agi sa insakto nga proseso.
Suno kay Galagate, tinutuyo sang amo nga memorandum agud ma –imbestigaran sang insakto kag makuha kag mapamatian man ang side sang magtimbang nga bahin.
Pahayag pa sini nga kun mapamatud-an ang amo nga alegasyon, ginasiguro sini nga indi sini pag-itolerar ang kasubong nga pamatasan sang isa ka empleyado kag pagahatagan ini sang nagaka-igo nga aksyon.
Dugang pa sini nga, indi gilayon maghatag sang komento kun wala pa mapamatian ang pahayag sang isa ka grupo kag indi magbuhi sang mga tinaga nga nagakumpirmar nga matuod ang nasambit nga alegasyon.
Gin-engganyo naman ni Galagate ang nasambit nga tagreklamo nga magpadulong sa amo nga talatapan agud magsumiter sang complaint batuk sa amo nga empleyado agud mahatagan sang nagakaigo nga imbestigasyon.
