ROXAS CITY – Nagpapanaog sang apat ka mga executive orders ang alkalde sang syudad bilang precautionary measures agud mapunggan ang paglapta sang Coronavirus Disease (COVID-19).
Ang na una nga EO No. 9 amo ang nagamando sa pagpaidalom sang mga indibidwal sa 14 day self-quarantine nga may yara sang travel history nagikan sa mga lugar nga may positibo nga kaso sang COVID-19.
Ikaduha, EO No.10 nga amo pagsuspende sa moving up ceremonies sang mga day care centers sa syudad.
Bangud diri, igahatag lamang sang mga manunudlo sa mga ginikanan ang certificate sang ila nga estudyante nga nagapamatuod nga sila ang nagtapos.
Ikatatlo, EO No. 11 nga amo ang pagsuspende sa tanan nga mga major gatherings sa mga eskwelahan mapa-pribado man ukon pampubilko nga buluthuan, wala sang mga reunions, rallies, ukon mga matililipon sang madamo nga tawo sa isa ka lugar.
Ikaapat, amo ang EO No. 12 nga nagasuspendi sang klase sa tanan nga lebel sa syudad sumugod Marso 13.
Samtang mangin half day ang opisina sa City Hall bangud magapatigayon sang pagdisinfect kalakip na ang mga transport terminal nga nagaserbe nga boarder control kag merkado.
Ini ang tikang sa alkalde sa pamahog sang COVID-19.
