Ginpakigbahin ni Mamamayang Liberal party-list Representative Leila De Lima nga naggamay na ang kalibutan sang mga co-perpetrators ni Former Presidente Rodrigo Duterte matapos sila ginhingadlan sang International Criminal Court (ICC).
Ini ang ginalakipan nanday Senador Ronald “Bato” Dela Rosa, Senador Bong Go, Former Justice Secretary Vitaliano Aguirre II, kag pila pa ka mga opisyal sang Philippine National Police (PNP).
Sa video statement nga ginpaguwa sang senador kahapon nga adlaw, Pebrero 14, ginpahayag sini nga ginpaandaman niya ang mga naghimo sang krimen, bisan pa nga yara siya sa sadto sa prisuhan, nga magaabot ini nga adlaw nga manabat sila. Ginsiling sini nga kaangay sang anay Presidente, wala sila nagpamati kag sa baylo nangin arogante pa sila.
Nagpaandam man si De Lima nga madamo sa ila ang magapanago kag mag-upod kay Senador Bato nga nagapanago sa kasuguan.
Apang suno sa iya, bisan ano pa ang matabo, lagson sila sang hustisya kag magapangibabaw ang hustisya.
Una diri, base sa ginpaguwa nga dokumento sang ICC, ang paglakip kanday dela Rosa kag Go sa listahan bangud sa ila papel sa pagpatuman kag pagsuporta sa drug war policies ni Former President Duterte.
Matandaan nga nagserbe si dela Rosa bilang national police chief nga nagpanguna sa pagpatuman sang kampanya batok sa illegal nga droga, samtang si Go ang nagserbe bilang Special Assistant to the President (SAP).
