GENERAL SANTOS CITY- Gindakop sang mga otoridad ang isa ka coach sang Volleyball Team sa nagapadayon nga Batang Pinoy 2025 sa General Santos City, bangud sa ginapahayag pagpangmolestya sa isa ka 17-anyos nga player sini.
Ang coach amo si alyas “Roger”, 43-anyos, manunudlo kag Head Coach sang isa ka women’s volleyball team.
Sa interview sang Bombo Radyo kay Police Ltcol. Rexor Canoy, spokesperson sang General Santos City Police Office, iya ginpahayag nga natabo ang insidente takna la-1 sang kaagahon sa sulod sang billeting area sang team kun sa diin nga samtang nagakatulog ang biktima, ginhawidan ang pribado sini nga bahin kag amat-amat nga ginhuba ang boxer short sini.
Suno kay PLTCOL. Canoy, namangnuhan ini sang mga kaupdanan sang biktima kag nakit-an mismo ang natabo apang kaangay nga wala sang labot ang amo nga coach kag padayon sa iya nga ginahimo.
Pahayag nya, gilayon naman nga ginreport sang biktima sa ila nga talatapan ang amo nga insidente kag ginpadulungan ang lugar sa diin nga nadakpan man ang amo nga coach.
Nagapangatubang ini sa subong sa kaso nga Act of Lasciviousness sandig sa RA 7610.
Sa subong, nagapabilin ini sa kustodiya sang General Santos City Police Office, para sa nagakaigo nga disposisyon.
via Bombo Mira Cerbo (Bombo Radyo Koronadal)
