Ginpahayag ni Coach Tim Cone ang wala na nya nga pagkakibot nga reaksyon sa natabo nga hampang sang Gilas Pilipinas kontra Saudi Arabia sa 2025 FIBA Asia Cup.
Sa ginpatigayon nga press conference matapos ang hampang, ginpakigbahin sini nga wala sang bag-o suno sa iya sa ginhimo nga pagpasulod sang puntos ni Justin Brownlee sa ulihi nga quarter.
Kun sa diin na-shoot sang nasambit nga Gilas player ang three-point shot sa nabilin nga 3.7 seconds sang fourth quarter.
Bangud sini, nangin tabla ang puntos sang magtimbang koponan sa iskor nga 79-all, nga rason sang pagtuga sang overtime.
Samtang, ginakalipay naman ni Coach Tim Cone ang nakuha nga ‘momentum’ sang pungsodnon nga koponan sa ulihi nga bahin sang hampang nga nagtulod agud nga makuha nila ang kadalag-an.
Kasunod sang big-shot ni Justin Brownlee sa natabo nga hampang, ginpakigbahin sang nasambit nga Gilas player ang iya nga pagpasalamat sa isig-kapareho nga manughampang sa ginahatag nila nga pagsalig sa iya.
Suno sa iya, ang kumpyansa sang koponan sa iya ang nangin ispirasyon agud mas mapaguha ang manami nga performance sa hampang.
Kadungan sang pagdaog, ginhatagan man sang pagkilala ni Coach Tim Cone ang isa pa sini nga player nga si Kevin Quiambao.
Ginakabig nga ang amo nga Gilas player bilang ‘young gun’ sang koponan sa ginpakita sinib nga kinaagman sa hampang kun sa diin naghimo kag nagpasulod ini sang 17 puntos.
Sa karon, ginapreparahan na sang Gilas Pilipinas ang masunod sini nga hampang kun sa diin pagaatubangon sini ang koponan sang pungsod Australia.
