Ginpasaka sang Capiz Provincial Disaster Risk Reduction and Management Office (PDRRMO) sa Code Blue ukon blue alert status sang probinsya bilang preparasyon sa epekto sang Bagyong Inday.
Ang Code Blue nagakahulugan sang padayon nga pagmonitor sa sitwasyon, pagpanghanda batok sa posible nga pagbaha, kag pagpaalerto sa tanan nga mga ahensya.
Sa interview sang Bombo Radyo kay Atty. Shiela Artillero, head sang Capiz PDRRMO, iya ginpahayag nga naka-alerto na ang ila opisina kag handa magresponder sa posible nga pagbaha sa probinsya.
Suno kay Artillero, walo ka local government units (LGUs) ang nagsuspender sang klase sa tanan nga lebel, ini amo ang mga banwa sang Pontevedra, Panay, Dumarao, Dao, Mambusao, Sapian, Ivisan, kag Cuartero.
Nagpanawagan man ini sa publiko nga magpabilin nga alerto kag sundon ang mga advisory sang mga lokal nga opisyal.
