Nagapanawagan ang Commission on Elections (COMELEC) sa mga kwalipikado nga botante nga magparehistro sang temprano agud malikawan ang pagdamo sang tawo sa opisina.
Ini kasunod sang Resolution No. 11191 ukon Calendar of Activities para sa Barangay kag Sangguniang Kabataan Elections nga pagahiwatin sa Nobyembre 2, 2026.
Ang voters registration ang nag-umpisa sang Oktubre 20, 2025 kag magatapos sa Mayo 18, 2026, samtang ang hulihi nga adlaw sang pagsumite sang Statement of Contributions and Expenditures (SOCE) sa Disyembre 2, 2026.
Sa interview sang Bombo Radyo kay Atty. Rommel Benliro, City Election Officer IV sang COMELEC Roxas City, iya ginpahayag niya nga antes ang deadline, kinahanglan makaparehistro na ang mga bag-o nga botante, kag mahimo man ang pagpa-reactivate ukon pag-update sang rehistro.
Ginpabutyag man sang natungdan nga bukas ang opisina sang COMELEC halin alas-8:00 sang aga tubtob alas-5:00 sang hapon, Lunes tubtob Biyernes.
Para makaboto sa barangay election, dapat 18 anyos pataas, samtang sa SK naman dapat 15 tubtob 30 anyos antes ang Nobyembre 2, 2026, kag kinahanglan Pilipino nga naga-istar sa pungsod sa sulod isa ka tuig kag residente sang barangay sa sulod anim ka bulan antes ang eleksyon.
