Nagpadala sang sulat ang Alliance of Concerned Consumers in Electricity and Social Services (ACCESS) sa Senado nga nagahingyo nga imbestigaran ang madugay na nga problema sa power supply nga nagaapekto sa Visayas grid.
Sa interview sang Bombo Radyo kay Mr. Wennie Sancho, Presidente sang grupo, iya ginpahayag nga ang sulat ang naka-address kay Senator Raffy Tulfo, chairperson sang Committee on Energy, nga nagahingyo sang Senate inquiry in aid of legislation.
Suno kay Sancho, nangin seryoso na nga concern sang konsumidor ang liwat-liwat nga pagpaidalom sang Visayas grid sa red kag yellow alert bangud sa kulang nga supply sang kuryente.
Pahayag niya, indi dapat mabatyagan sang publiko nga ordinaryo na lang ini nga sitwasyon bangud nagaagunto ang tawo kag kinahanglan sang mas reliable kag estable nga power supply.
Nagapanawagan man si Sancho sa Senate Committee on Energy nga kwestyunon ang Energy Regulatory Commission, Department of Energy kag ang National Grid Corporation of the Philippines tuhoy sa sitwasyon ilabi na sa salabton sang mga power plants.
Luyag niya nga ipaathag sang mga ahensya kun ano nga mga tikang ang ginhimo batuk sa mga power plants nga posible nagalapas sa pagsulondan sa ginapahanugotan lang nga numero sang outages sa kada tuig.
Dugang pa sang natungdan, kinahanglan nga may yara sang disiplina kag accountability sa power industry bangud kun wala ini, magapadayon lang ang problema kag ma-trap na lang ang mga konsumidor sa yellow kag red alerts.
