ROXAS CITY – Pormal na nga ginbuksan sang Bureau of Fire Protection (BFP)-Roxas ang fire-sub station nga nahamtang sa Barangay Culasi, Roxas City, kahapon nga adlaw, Oktubre 14, 2022.
Ginpangunahan ni Rev. Fr. Anthony Bautista ang inagurasyon kag blessing sang gintukod nga fire-sub station kaupod si Regional Director CSupt Jerry Candido, Provincial Director Supt Jenny Mae Masip, Congressman Tawi Billones, Roxas City Mayor Ronnie Dadivas kag Vice Mayor Teresa Almalbis.
Sa pakig-angut sang Bombo Radyo kay CSupt. Jerry Candido, ginpaathag sini ang importansya sang sub-fire station ilabi na sa panahon sang emerhensya.
Suno diri ang fire-sub station ang isa sa pamaagi agud madasig nga makaresponde ang mga katapo sang BFP sa ginluntaran sang sunog ukon lugar nga nagakinahanglan sang ila serbisyo.
Ginsiling ni Candido nga kun madasig ang pagresponde sang bombero daku nga tsansa nga masalbar nila ang kabuhi sang tawo kag malikawan ang daku nga kahalitan sa mga propedad.
Pahayag pa sang opisyal nga nagmandu ini sa mga fire marshal nga may yara sang duha ukon masobra nga fire trucks nga magpangita sang barangay nga strategic pahamtangan sang sub-station agud madasig makalab-ot ang bulig sa nagakinahanglan.
Nagalaum si Candido nga madamo pa sang sub-station ang matukod sa probinsya sang Capiz kag sa bug-os nga Western Visayas.
Mahibaluan nga aktibo na nga sub-station ang Culasi sang nanligad nga tuig, apang subong lamang natigayon nga ma-inagurahan bangud sa pagpamahog sang COVID-19.
