Nadiskubrehan sang Department of Agriculture ang ginaalegar “ghost” farm-to-market roads nagabalor P75 million sa Mindanao.
Suno kay Department of Agriculture Sec. Francisco Tiu Laurel Jr., may yara pa lamang sila sang initial reports kag ginakabig sini nga isolated cases ang nadiskubrehan sa Region XI kag sa Zamboanga City.
Pahayag niya, ang proyekto ang ginalantaw nag-umpisa sang 2021 kag gina-usisa pa sang ahensya ang nasambit nga issue.
Dugang pa sang natungdan, “magagmay” nga mga contractor ang na-identify sang ahensya nga naangot sa proyekto.
Buot silingon, ang na-identify sang Department of Agriculture nga contractor sa ginaalegar “ghost” farm-to-market-roads ang indi kabahin sang 15 ka mga contractor nga ginpangalanan ni President Ferdinand Marcos Jr. nga nag-corner sang kadam-an sang mga flood control projects sang pungsod.
Gin-athag man ni Tiu Luarel nga indi kabahin sang “insertion” sa budget ang nasambit nga proyekto apang ang implementing agency amo ang Department of Public Works and Highways.
Nakapakig-angot naman ang Department of Agriculture kay DPWH Sec. Vince Dizon may kaangtanan sa issue kag napahibalo naman si President Marcos sa diin pormal nga magapasa si Tiu Laurel sang report sa Oktubre 1.
