Ginpahayag ni Department of Agriculture (DA) Secretary Francisco Tiu Laurel Jr. nga padayon ang koordinasyon sang ahensya sa iya mga sub-agency agud maatubang ang pamahog sang mas mabaskog nga El Niño sa pungsod.
Ginmandu ni Laurel ang National Food Authority (NFA) nga gamiton ang daku nga bahin sang ila budget sa aktibo nga pagbakal kag pagtipig sang palay kag bugas agud mapun-an ang ila mga bodega. Suno sa iya, 40 porsyento na lamang sang nabilin nga ani sa pungsod ang kinahanglan pa mabakal antes matapos ang tig-ani.
Ginsiguro man sang ahensya nga puno ang mga cold storage facility para sa iban pa nga mga produkto sang agrikultura. Padayon man ang pagpanagtag sang solar pump irrigation sa mga lugar nga may yara pa sang makuhaan sang tubig agud maminusan ang epekto sang tuman nga tig-ilinit.
Ginpahayag ni Secretary Tiu Laurel Jr. nga padayon ang pagsalig sang ahensya nga indi magkulang ang supply sang mga nagapanguna nga kinahanglanon sa merkado.
Suno sa iya, ang pag-angkat sang mga produkto halin sa iban nga pungsod amu lamang ang mangin katapusan nga option sang gobyerno kun magkulang ang lokal nga produksyon.
Sa bahin sang pondo, nakabaton na ang ahensya sang P2.6 bilyon halin sa ginapangayo nga P45 bilyon nga supplemental budget para sa gilayon nga pagpatuman sang mga tikang nga magapamenos sang epekto sang krisis kag El Niño.
Ginalauman man sang ahensya ang dugang nga P10 bilyon para sa solar irrigation, mga water pump kag biofertilizer, lakip na ang Presidential Assistance to Farmers and Fisherfolks bilang pagpanghanda kag pagbulig sa mga mangunguma kag mangingisda.
