Nagbilin sang masobra 140 ka mga patay ang Bagyo Tino partikular sa Visayas kag Mindanao, samtang 127 pa ang ginreport nga missing.
Una na nga ginkumpirmar sang National Disaster Risk Reduction and Management Council (NDRRMC) base sa datus, naglab-ot na sa 114 ang reported death toll bangud sa bagyo, apang wala pa diri nalakip ang dugang nga 28 nga narecord sa Cebu, ang pinaka apektado nga probinsya. Sa data sang ahensya, may kabug-usan nga 71 ka na-record nga napatay sa Cebu.
Ang Cebu, sa diin nag-landfall sa ikaduha nga tion ang bagyo Tino, nag-antos sang wala ginalauman nga grabe nga baha sa mga banwa kag syudad sa diin ang mga salakyan gin-anod kag madamo nga mga panimalay ang nalumos sa baha.
Ang iban pa nga mga lugar nga nakarecord sang casualty amo ang Negros Occidental, Negros Oriental, Agusan del Sur, Southern Leyte, Antique, Bohol, Capiz, Iloilo kag Leyte.
Lakip man sa numero sang casualties amo ang anum ka mga crew sang military helicopter nga nag-crash samtang yara sa relief mission sa mga ginhalitan sang bagyo.
