Naglab-ot na sa 26 ang narekord nga mga napatay sa pag-igo sang mga nag-agi nga mga bagyo Mirasol, Nando, kag Opong sandig sa nangin report sang National Disaster Risk Reduction and Management Council (NDRRMC).
Sa ila nga situational report, apat sa mga napatay ang narekord sa Cordillera Administrative Region (CAR), samtang 22 naman ang ginapaidalom sa validation sa iban pa nga rehiyon kalakip ang Cagayan Valley, Central Luzon, Bicol, Central Visayas, kag Eastern Visayas.
Ginreport man ang 33 ka mga pilason, kun sa diin 14 ang gina-validate pa, kag 14 nga iban pa ang nagapabilin nga missing.
Samtang, masobra 738,000 ka mga pamilya ukon halos 2.8 milyon ka mga indibidwal naman ang apektado sang mga nag-agi nga bagyo, kun sa diin masobra 46,000 ka pamilya ang nagapabilin pa sa 2,680 evacuation centers, kag masobra 31,000 ka mga pamilya naman ang nakabaton na sang bulig sa luwas sang evacuation centers.
Kaangut sini, ginreport man sang NDRRMC nga nagpanguna ang Bicol Region sa numero sang apektado nga tawo, ilabi na sa Masbate kun sa diin tuman nga nag-igo ang bagyo Opong sang Biyernes.
Dugang pa sini, naglab-ot na sa P864 million ang ginbilin nga halit sa imprastruktura sang mga tinalikdan nga bagyo halin sa nagkalain-lain nga rehiyon, samtang nagdangat naman sa masobra P1 billion ang halit sa agrikultura.
