Nagdangat na sa 25 ang numero sang mga napatay sa pagpanalasa sang nag-agi nga mga kalamidad sa pungsod.
Sa datos sang National Disaster Risk Reduction and Management Council sining Sabado, 10 ang napatay ang nagikan sa Mimaropa, 5 sa Region 6, 2 sa Region 7, 4 sa Region 9 kag 4 sa BARMM.
Sa nauna nga 13 ka nareport nga napilasan bangud sa epekto sang mga bagyo kag habagat, yara sa 3 diri ang kumpirmado na, samtang ginaberipika pa ang 10 ka iban pa.
Sa karon, 8 sa gihapon ang missing kun sa diin 6 diri ang kumpirmado na, samtang ginaberipika pa ang 2 ka missing.
Sa mga apektado nga pamilya, yara sa masubra 380,000 sa gihapon ang apektado kun sa diin nagapabilin sa mga evacuation center ang yara sa masubra 5,000 ka pamilya.
Sa datos man sang ahensiya, nakapagkit sang 5 ka insidente sang landslide sa Region 2 kag tig-1 sa Calabarzon kag Region 5.
Samtang, naghupa naman ang baha gumikan sa 113 ka lugar nga nauna na nga nareport nga ginbaha bangud sa mga tuman nga pag-ulan dala sang mga nag-agi nga bagyo.
Dalayon naman ang pagdul-ong sang gobyerno sang bulig para sa mga naapektuhan nga pamilya kun sa diin yara sa masubra P43 million na ang balor sang relief assistance nga napanagtag.
