Gin-anunsyo sang gobyerno sang China ang pagpatuman sang travel ban batok kay Defense Secretary Gilberto Teodoro Jr. kag sa iya malapit nga pamilya, nga nagadumili sa ila pagsulod sa mainland China, Hong Kong kag Macau. Lakip man sa mga ginpatuman nga tikang ang pagdili sa mga indibidwal kag kompanya sa China nga makigtransaksyon ukon makigkooperar sa iya kag sa iya pamilya.
Suno sa Chinese Foreign Ministry, ang desisyon may kaangtanan sa mga pahayag ni Teodoro nga ila ginakabig nga makahalit sa interes sang China kag sa relasyon sang duha ka pungsod. Wala naman ginpatin-aw sang Beijing kon ano gid nga mga pahayag ang ila ginbatukan.
Si Teodoro isa sa mga pinakabaskog nga kritiko sang China may kaangtanan sa mga isyu sa West Philippine Sea kag South China Sea. Sang nagligad nga semana, gintawag niya ang China bilang isa ka seryoso nga hulga sa seguridad kag teritoryo sang Pilipinas.
Sa pihak sang sanction, ginpahayag ni Teodoro nga wala siya sang kabtangan sa China kag wala man siya plano nga magkadto didto. Samtang, ginakabig naman sang gobyerno sang Pilipinas nga isa ka “indi mabinuligon nga tikang” ang ginpatuman nga sanction sang China.
